كل يتمنى وهذا مااتمنى ( منوه الروح )

مختلــــــــــف · 15-12-2008, 12:40 AM

منوه الروح

فرقى الخليل اللـي تولـع بخلـه
وضو القمر ساطع علينا انحداري

فكـري تلاعبّـه خليلـي بحلـه
ملبوس من زخ المياه البكـاري

اجهـز اللـي صافـط ٍ بالمظلـه
من وارد اليابان جزل المهـاري

أمشي كمـا التايـه مضيـع هلله
مامن مكان بخاطري بالصحـاري

معي ثلاث مـن الشغاميـم فلـه
ارداهم اللـي قايـد ٍ للضـواري

ننزل بمنزال محـد واصـل لـه
ربيعها يكسي التـلاع السـواري

ونشـب نـار ٍ للمباهيـر خلـه
ونركي عليها ممسكات الظفـاري

وخله تَحَامى ليـن ماهـا تزلـه
ثم ركده حتـى تخمـد الفـواري

ثم سلها ياخوك من فـوق دلـه
على مقاطيف السنـه بالبـراري

واردف يمينك وازعجه بصبتلـه
خله يذوق الكيف بـن الهـراري

ترى الولع ياخوك محد فطن لـه
الكل شَاغِل مشغلتـه الطـواري

نصنع خطوط ٍ بالبـراري محلـه
ما يسلكه غير الجيوب الحراري

نطرد ورى الكدري لمورد يدلـه
ونصيد منه اللي يجينـا طيـاري

حتى تشوف الشمس نـوره تسله
يم الغروب شويش والجو عاري

ننصى نوازي شامخـات مطلـه
شرقي من المظهور ذيك المحاري

نسناسهـا بالليـل محـد ٍ يملـه
لاجا هبوبـه مزمّـر ٍ للبـواري

هذي مناه الروح وهي راحة لـه
يالله عسى ربي يجيب الخبـاري

لكم ودي

محمد الصييفي · 15-12-2008, 12:50 AM

الله يجيب الخباري ......

إلا أبو عهد ما يمديني أصير رابع الشغاميم

الله يحقق مناك

تقبل حضوري.

صالح الفديد · 15-12-2008, 01:19 PM

صح لسانك ابو عهد

مبدع قليله بحقك

سعد الثابتي · 15-12-2008, 01:41 PM

(( أبو عهد ))

صح لسانك , قصيدة جزلة يالغالي .

أسلوب راقي, وأجزاء مترابطة , ومشاعر صادقة .

شكرا ألف .

GoodMan · 15-12-2008, 02:06 PM

قصيدة جميلة والخباري واجد تبي دليله

ضيف الله حماد · 15-12-2008, 10:40 PM

صح لسانك

ماتبي لك خوي

عبد الاله · 15-12-2008, 11:40 PM

صح لسانك ابو عهد

مبدع

أبو تركي · 16-12-2008, 04:16 PM

صح لسان الخوي

نديم الليل · 16-12-2008, 06:36 PM

صح لسانك يا بعدي

ايه من أول ابو عهد

بعد نبي من الي أخبر

مختلــــــــــف · 23-12-2008, 01:00 AM

اقتباس:

المشاركة الأصلية كتبت بواسطة محمد الصييفي


	الله يجيب الخباري ...... إلا أبو عهد ما يمديني أصير رابع الشغاميم الله يحقق مناك تقبل حضوري.

هلا ابو صالح

إلا انت منهم يالغالي مو لازم تصير رابعهم
شكر لمرورك .. ولاتحرمنا طلتك

مودتي وتقديري